今日進行o左一樣好耐好耐無做過o既活動，就係釣魚
事緣，老婆o既朋友不嬲都有攪開釣魚團，由於仲未到出海o既時間，所以今次去魚塘釣兼燒烤，就搵埋我地幾個人一齊去。結果今朝晨咁早就出發，八點半o係關閘等，跟手坐專車去橫琴。成班一行廿幾人，包o左個魚塘仔去釣，最初去到都以為無得釣多，點知朋友仔原來帶o左幾支「竹」，無錯，係「竹」，佢地係咁形容o的唔知幾多錢o既魚杆。
其實我咁大個仔都未試過真真實實咁用支竹去釣魚，用魚排o係碼頭邊抽下抽下就試得多，見人地用竹去釣，我就一次都未試過，最多都只係打機試過o者，今次終於有機會啦！我地今次主要係用蝦做餌再加浮標，初初都係老婆釣多，因為佢比我更鍾意釣魚，又唔知點解佢用果支竹又真係好多魚上釣，一黎頭兩單就佢中晒。佢釣o左一陣肚餓就去燒野食，終於到我啦。一黎放低半個鐘左右，跟住就發覺中呀，一釣返黎原來係大星鱸黎，抽o左一半o的人驚我攪唔掂，所以就幫我手抽，好開心呀，未試過釣到咁大條魚o架 :D 仲要第一次用竹釣就咁大條魚，簡直令人震奮。
跟住就一邊食一邊釣，結果就曬到成個「關公」咁，有個紅鼻子添呀，哈哈！真係好耐無試過玩得咁開心，最後玩到六點幾先收檔。我就只係釣到三條魚，老婆反而釣到十條。不過今日真係好盡興，好耐好耐都未試過玩得咁開心！ :D
No comments:
Post a Comment